بريوش باللبن و نكهة الحامض
تحية عطرة لكن نيقاتي وسنة هجرية سعيدة الله يدخلها عليكم بالصحة والعافية
اليوم كنقدم لكم بريوش باللبن والحامض نتمنى ينال اعجابكم
1 بيضة
2 كيسان(العنبة) لبن
1 كاس صغير زيت
1 كاس صغير سكر
ملعقة كبيرة خميرة فورية
1 خمارة الحلوى
قبصة ملح
قشرة حامضة
الدقيق حسب الخليط
للتزيين
أصفر بيضة + قطرات خل
جنجلان
سنيدة
نباج+لوز محمر و مهرمش
فزلافة العجانة كندير القشرة الحامضة محكوكة و سنيدة و الزيت و اللبن يكون بحرارة الغرفة أو ندفيه شوية
نزيد البيضة و الخمارة و الخميرة الفورية و الدقيق و نخدم العجانة و أنا كنزيد الدقيق بشوية بشوية حتى نحصل على عجينة مرخوفة بزاااف و كتلصق فاليدين
ندلك العجينة واحد 10 دقايق و نغطيها و نخليها حتى تخمر و يتضاعف حجمها
ندهن يدي بالزيت و نخرج منها الهوا
و نعمل منها كويرات صغار أو متوسطين حسب الرغبة
نخليهم يخمرو شوية
و نسخن الفران
ندهنهم بأصفر البيض مع قطرات الخل
جزء زينتو بالجنجلان و جزء بسنيدة و جزء خليتو عادي
و من بعد ندخلهم للفران حتى يطيبو و يتحمرو
هدا شكلهم ملي خرجتهم من الفران و الجزء اللي خليتهم بلا تزيين دهنتهم بالنباج و رشيتهم باللوز محمر و مهرمش
و بالصحة و الراحة
