حلوة الوردة باللوز راقية

هاد الحلوى كاتجي راقية جدا من مطبخي و بالتفصيل الممل

العجينة:
500غ دقيق الفورص الخاص بالحلويات
125غ زبدة مدوبة
2 معالق كبار سكر كلاصي
قبصة ملح
ماء الزهر لجمع العجين و إلا كان من نوع جيد ممكن تضيفي ليه ماء بارد
ملون أخضر و برتقالي

نغربل الدقيق و الملح و السكر كلاصي و نزيد الزبدة مدوبة و نخلط مزيان بأطراف الأصابع حتى ندخل الزبدة فالدقيق و نحصل على خليط مرمل نزيد الماء الزهر و الماء حتى تجمع العجينة و ما تكون لا قاصحة لا مرخوفة بين و بين نلون العجينة بالملون أخضر و نقص جزء منها نلونو بالبرتقالي أو الوردي (حسب الرغبة) ...ندلك كل واحدة مزيان حتى تولي لينة و مطاطية...نكورها و نغطيها ببلاستيك غدائي و نخليها ترتاح.

العقدة د اللوز:

500غ لوز مصلوق و مقشر و منشف و مطحون مع 250غ سكر سنيدة...
شوية المسكة الحرة مدقوقة مع شوية السكر
الماء الزهر تقريبا نصف كاس صغير
50حتى 100غ زبدة على حسب نوعية اللوز
1ملعقة كبيرة كونفتير مشماش يكون سائل

نخلط كل المقادير حتى نحصل على عقدة اللوز نغطيها ببلاستيك و نخليها ليلة كاملة في الثلاجة
الغد نعمل منها كويرات صغار بهاد الشكل





ناخد كورة العجين الأخضر نطلقها فالأول بالدلاك فوق مكان مرشوش بالدقيق




عاد ندوزها فالماكينة د السباغيتي و تكون رقيقة شوية
نقطعها دوائر بالمرشم
ندهن الدائرة بأبيض البيض





نحط 3 كويرات من العقدة بهاد الشكل




نجمع الجناب بقطيب ديال العود بهاد الطريقة




ندهن من فوق بأبيض البيض




نقطع الوريقات بهاد المرشم




نغطي كل كويرة د اللوز بوريقة العجينة هكدا




ننقش الوريقات بالنقاش هكدا




ناخد العجينة البرتقالية و نطلقها رقيقة بزاااف و نقطعها بمرشم صغير




نقطع الدائرة على 2




نعمل وردة صغيرة بلف نصف الدائرة بهاد الشكل




نوسع بين الكويرات اللوز بالقطيب بهاد الشكل




ندهن الثقب بأبيض البيض باش تثبت الوردة مزيان




ندخل راس القطيب الخشبي فوسط الوريدة و نثبتها وسط الكويرات بهاد الشكل




و ها الحليوة ديالنا كملات




نزين الوريدات ديالنا بالعقيق الفضي
ونستف الحليوات فوق لاطة الفران مغطية بورق السولفيريزي و نغطيها و نخليها ليلة كاملة








في الغد ندخلها لفرن مسخن من قبل و نقابلها غير تشمع و تشد راسها و نخرجها ما خصهاش تتحمر باش ما تفقد اللون ديالها
ملي تبرد ندهنها بالنباج
و هدا الشكل النهائي



اللهم أدمها نعمة و بارك لنا فيها و احفظها من الزوال


اناقة مغربية

_{هذه المقالة نشرت أصلا في موضوع المنتدى : حلوة الوردة باللوز حلوة راقية من مطبخي و بالتفصيل الممل كتبت بواسطة وردة مغربية مشاهدة المشاركة الأصلية}