ميني بتي بان

بسم الله

اللهم صل على محمد وعلى ال محمد كما صليت على ابراهيم وعلى ال ابراهيم وبارك على محمد وعلى ال محمد كما باركت على ابراهيم وعلى ال ابراهيم في العالمين انك حميد مجيد

المقادير
عجين العشر دقائق فيه
2 ك ك ما دافي
ملح
2 م ك نيدو
2 م ك خميرة دالخبز
نص ك ك زيت
فاني
ك ك سنيدة (او اقل حسب الذوق)
الطحين (تقريبا 6 الكيسان كبار)
الشكلاط .الكونفتورواللوز افيلي للتزيين

الطريقة

ديما كنزل عجينة العشر دقائق مصاوبة وبزاف دالبنات طلبو ليا الطريقة ونزولا عند طلبهم صورتها هاد المرة
فقصرة كنديرو نيدو والخميرة والملح وسنيدة وفاني و 2 ك ك فقط طحين والما دافي نخلطو الكل ونخليوها ترتاح 10 د (كتكون جارية).من بعد 10د كنزيدو عليها نص ك ك زيت والطحين حتى تجمع ويني تبقى مطلوقة واخا تلصق لينا فيدينا ندهنوهم وندلكوها وغادي تجمع لينا.هي الوصفة الاصلية فيها 5 ك طحين 2 فالاول و 3فالاخر ويني كتبقى جارية بزاف

الصور مع الشرح
المواد الجافة

الما دافي

2 ك ك طحين

نخلطو مزيان ونخليوها ترتاح 10د

نزيدو الزيت

والطحين ويني منقصحوهاش بزاف

ندلكوها وهاهي واجدة

نسرحوها طويلة ونديرو طريفات الشكلاط

وشوي الكونفتور

نلويوها

نسدو لعجينة مزيان باش متحلش فالخميرة ونقطعوهم صغيورين(4cm)

نستفوهم فلاطة مدهونة ونغطيوهم بمنديل ومانطة باش دغيا يخمرو حنت فيهم 2 م ك خميرة

ندهنوهم بصفر دالبيض مع شوي نسكافي والخل باش يحيد الزفورة دالبيض ونرشوهم باللوز افيلي ونطيبوهم

وهاهوما واجدين

كيجيو صغيورين وفنيونين

نديروهم فوق منديل حتى يبردو ونديروهم فبلاستيكة فالتلاجة

وهاهوما بالصحة والراحة

عن قرب

وهنا ملي قدمتهم لضيوفي مع الشنيك (نفس العجينة) حتاهوماساهلين ماهلين. جاو لداد وممتازين دابا نزلهم ان شاء الله

خلاصة

هاد الميني بتي بان سريع وزوين وكينفعني كل مرة نجبد القياس ونسخن للفطور او الكوتي

نصيحة مهمة

بالنسبة للتسخان سوى ديال هاد البتي بان او الخبز او اي حاجة.سخنوها فالفران د الضو او الغاز اولا ديرو بحالي ملي كينزل عليا العكز كنسخن غي فالككوط بلا صفارة ونقص العافية كيسخنو مزيان بحال الفران.وبعدو على الميكروند لانه كتاشفو ان هادوك الموجات او les ondes ديالو كيتسببو ف des cellules cancereuses الله يحفض.انا من عند الله هادي عام دابا باش تهرسات واحد البلاستيكة ومابقاش كيتسد الباب مزيان صافي خسر. والعكز كل مرة باش نصاوبوه وفالاخير قريت على الخطورة ديالو فالانترنيت واكدوها ليا صحباتي وخويا قالي رميه را منعوه فبعض الدول. صافي وعرفت انها فيها خير ملي خسر ودابا راه غي كيتسنط لعضامو فالكوزينة ههه
نتمنى يعجبوكم كريويصاتي وتجربوهم وكناكد على ضرورة العجينة تبقى مطلوقة بحال لكرص.ولي مافهماتش شي حويجة انا رهن الاشارة.وياربي يبقى هاد الموضوع تاني را طاقية الاخفاء غي كدور فالمنتدى الله يحفض وصافي هههه

صلوا على الحبيب المصطفى.ففي الصلاة عليه الخير والبركة

اللهم صل على محمد وعلى ال محمد كما صليت على ابراهيم وعلى ال ابراهيم وبارك على محمد وعلى ال محمد كما باركت على ابراهيم وعلى ال ابراهيم في العالمين انك حميد مجيد
http://www.youtube.com/watch?v=7KYDLwx6_dQ